Хүнс, хөдөө аж ахуй

БУЛГАН АЙМГИЙН МАЛ ЭМНЭЛГИЙН ГАЗАР
ДУУРИАЛГАН ҮЗҮҮЛЭХ ДАДЛАГА СУРГУУЛЬ
МАЛ ЭМНЭЛГИЙН ХОРИО ЦЭЭРИЙН ДЭГЛЭМИЙН ҮЕД АВЧ ХЭРЭГЖҮҮЛЭХ АРГА ХЭМЖЭЭНИЙ ТАЛААР ҮЗҮҮЛЛЭЭ

ГАМШГААС ХАМГААЛАХ КОМАНД ШТАБЫН СУРГУУЛИЙН ХҮРЭЭНД БУЛГАН АЙМАГТ ТАНХИМЫН ДАДЛАГА СУРГУУЛИЛТ ЗОХИОН БАЙГУУЛАГДАЖ БАЙНА
Онцгой байдлын ерөнхий газрын дэмжлэгтэйгээр Мал эмнэлгийн албаны Гамшгаас хамгаалах команд штабын сургуулийн арга хэмжээ нь улс орон даяар мал эмнэлгийн ерөнхий газар болон харьяа 21 аймаг, нийслэлийн Мал эмнэлгийн газар, Улсын мал эмнэлэг ариун цэврийн төв лаборатори, Мал эмнэлгийн эмийн сорилт баталгаажуулалтын улсын лабораторийн нийт бие бүрэлдэхүүн танхим болон цахимаар шууд холбогдон оролцож байна.
Монгол Улсын Үндэсний аюулгүй байдлыг хангах бүрэлдэхүүн хэсэгт ажил, үүрэгтэй шууд холбоотой асуудлууд цөөнгүй бөгөөд мал эмнэлгийн байгууллагын бэлтгэл бэлэн байдлыг дээшлүүлэх, хариу арга хэмжээг зөв оновчтой төлөвлөх, нэгдсэн удирдлага зохицуулалтаар хангах цогц тогтолцоог бүрдүүлэх шаардлагатай тул энэхүү сургуулийг улсын хэмжээнд зохион байгуулж,
Булган аймгаас нийт 140 орчим ажилтан албан хаагчид оролцож байна.

БУЛГАН АЙМГИЙН БҮРЭГХАНГАЙ СУМЫН ЦАХТ БАГИЙН МАЛЧИН БАТААГИЙН ДОРЖСҮРЭНГИЙН ГЭР БҮЛ МОНГОЛ УЛСЫН АВАРГА МАЛЧИН ӨРХ ХЭМЭЭХ ЭРХЭМ АЛДРЫГ ХҮРТЛЭЭ
❇️Улсын аварга малчин өрхийн шагналыг Булган аймгийн Засаг даргын орлогч О.Ундрах, Булган аймгийн Хүнс хөдөө аж ахуйн газрын дарга Ч.Амгалан, Бүрэгхангай сумын удирдлагууд гардууллаа.
🎖️Улсын аварга Батаагийн Доржсүрэн ажилч хичээнгүй буурал ижий аавынхаа малчин удмыг өвөлж 18 настайгаасаа одоог хүртэл 43 жил мал сүргээ өсгөн үржүүлж ашиг шимийг нь хүртэн амьдарч байна.
🎖️1999 онд Аймгийн тэргүүний сайн малчин, 2000 онд мянгат малчин, 2009 онд “Алтан тугалын эзэн”, 2010 онд сумын “Аварга малчин өрх”, 2015 онд Аймгийн манлай малчин хэмээх цолыг хүртсэн байна.
🐎Том хүү Д.Сумьяадэлгэр нь малч удмаа даган эцэг эхийн хамт мал маллаж, хурдан удмын адуугаа өсгөн үржүүлж аймаг бүсийн түрүүг олон удаа авч 2021 онд сумын алдарт уяач, 2023 онд аймгийн алдарт уяач цолоор шагнагдсан билээ.
👏Элдэв эрдэнэт хэмээх модон могой жилийн босгон дээр эрдэнэт мал сүргээ өсгөн үржүүлж, ашиг шим, тоо толгойг нэмэгдүүлэн малч ухаан, туршлагаараа манлайлж УЛСЫН АВАРГА МАЛЧИН ӨРХ хэмээх эрхэм алдар хүртсэн танай гэр бүлд халуун баяр хүргэж аз жаргал эрүүл энхийг хүсэн ерөөе.
БУЯНТ МАЛ СҮРЭГ ТАНЬ ТҮМ БУМААР ӨСӨХ БОЛТУГАЙ

УЛСЫН АВАРГА ТАРИАЛАНЧААР БУЛГАН АЙМГИЙН СЭЛЭНГЭ СУМЫН Б.ЭРДЭНЭДЭЛГЭР ТОДОРЛОО
Засаг дарга Д.Пүрэв-Очир: Булган аймаг бол хөдөлмөрлөсөн бүхэн хөгжин мандах, хичээсэн бүхэн хувьтай амьдардаг ерөөлтэй нутаг. Сэлэнгэ сум газар тариалангийн бүс, үржил шимтэй сайхан газар.
Тарьсан бүхэн урган цэцэглэж, үржин дэлгэрч байдаг газарт, хөдөлмөр бүтээл хүчин зүтгэлээрээ манлайлсан улсын аварга тариаланч "Ингэт толгой" ХК-ийн механикжуулагч Балганы Эрдэнэдэлгэрт Булган аймгийнхаа 60 мянган иргэдийн өмнөөс баяр хүргэлээ.
Ажил үйлс нь арвай буудай мэт урган дэлгэрч байх болтугай.

АДУУЧИН АВИРМЭДИЙН ЛХАГВАСҮРЭН УЛСЫН "ХОШОЙ АВАРГА МАЛЧИН" БОЛЛОО
Монгол улсын хэмжээнд 14 хошой аварга тодорсны нэг нь Булган аймгийн Сайхан сумын Ундрах багаас Авирмэдийн Лхагвасүрэн тодорчээ. Засаг дарга Д.Пүрэв-Очир Булган нутгийнхаа мал аж ахуйн салбарт өөрсдийн бахдам хөдөлмөрөө зориулан, буянт мал сүргээ өсгөж, гаргасан амжилтыг урамшуулан баяр хүргэж, аймаг орон нутгийнхаа нэрийг айргаараа цуурайтуулан байдагт талархал илэрхийлээд, тоо нь түм хүрч, тоос нь огторгуйд гарахын ерөөл өргөлөө.

"УЛСЫН АВАРГА МАЛЧИН” Д.БАТ-ЭРДЭНЭ
17-р жарны “Модон могой” жилийн босгон дээр Булган аймаг, Могод сумын Баян-Уул багийн малчин Доржсүрэнгийн Бат-Эрдэнэ “Улсын аварга малчин”-аар тодорлоо.
Аав ээжээс 100 орчим толгой малтай тулга тусгаарлаж байсан тэрээр 40 гаруй жилийн хугацаанд мал сүргээ 2700 орчимд хүргэж, бахдам сайхан амжилт гаргасан түүхтэй.
Улсын аварга малчин Д.Бат-Эрдэнэ таны Эрдэнэт сүргийн буян хишиг арвижин дэлгэрэх болтугай!

БАЯН-АГТ СУМЫН ДУЛААНХААН БАГААС "АЛТАН УНАГА"-НЫ ЭЗЭН ТОДОРЧ, АЙМГИЙН ЗАСАГ ДАРГА Д.ПҮРЭВ-ОЧИР ШАГНАЛЫГ ГАРДУУЛАН ӨГЛӨӨ
Булган аймгийн Баян-Агт сумын Балдираар нутагтай Маруушын Нямжавынх энэ жил "Алтан унага"-ны эзэн болж байна.
Эхнэр Жанчивдоржийн Хандсүрэн нь Сайхан сумын уугуул. Ханилаад хориод жил болохдоо хамтдаа зүтгэж хөдөлмөрлөсөн өдрүүддээ тэд, 2015 мянгат малчин, сумын сайн малчин, 2024 оны аймгийн аварга малчин, 2025 онд "Алтан унага"-ны эзэд болж тодорч байна.
Хамтдаа бүтээсэн амьдрал хамгийн жаргалтай.

МОНГОЛ УЛСЫН АВАРГА МАЛЧИН БАНЗРАГЧИЙН ЭЛБЭГБАТ ГЭРГИЙ ЛУВСАНГАСАНГИЙН ЭРДЭНЭ-ЭЛБЭГ
✅ Булган аймгийн Хишиг-Өндөр сумын Жаргалант багийн малчин Банзрагчийн Элбэгбат гэргий Лувсангасангийн Эрдэнэ-Элбэг нарт сар шинийн босгон дээр Монгол Улсын аварга малчны цом, өргөмжлөл, үнэмлэх, цол тэмдгийг нь гардуулан өглөө. Б.Элбэгбат нь 1992 оноос хойш мал маллаж, мал сүргээ дөрвөн төрлөөр нь өсгөн, сумандаа хамгийн олон адуун сүргийг үржүүлж, залуу малчдад үлгэр дуурайлал үзүүлж яваа нутгийнхаа бахархал болсон малчин юм.
ЭРДЭНЭТ МАЛ СҮРЭГ ТАНЬ АРВИЖИН, БУЯН ХИШИГ НЬ ДЭЛГЭРЭХ БОЛТУГАЙ

САЙН ХҮНИЙ ҮР
СҮҮТ ГҮҮНИЙ УНАГА
🇲🇳Монголын хөдөө, эх орны голомт нутгийг эзэнтэй байлгаж, нүүдлийн мал аж ахуй, өв соёлоо тээж яваа Аймгийн аварга малчин өрх Ням-Осорын Ариунбаярын гэр бүлд 47 жилийн түүхтэй Монголын Үндэсний Олон Нийтийн Радиогийн "Таван эрдэнэ" нэвтрүүлгийн нэрэмжит “АЛТАН ТУГАЛ”-ын шагналыг гардууллаа.
👏Н.Ариунбаярын гэр бүл 2012 онд мянгат малчин, 2019 онд сумын аварга малчин өрх, 2023 онд Аймгийн аварга малчин өрх хэмээх эрхэм цолыг хүртсэн.
🎖️1997 оны Бүрэгхангай сумын жилийн эцсийн мал тооллогоор таван хошуу малаараа 2000 мал тоолуулж байсан алдар түүхийн эзэн бол алтан тугалын эзэн Ариунбаярын аав Лувсандоржийн Ням-Осор билээ.
👏Сайхан буурал аавынхаа малч ухааныг хадгалж, ёс заншил, өв уламжлалаа тээж буй удам дамжсан ажилч, хөдөлмөрч малчин танд болон танай гэр бүлд талархал илэрхийлж, аз жаргал эрүүл энхийг хүсэн ерөөе.
ЭРДЭНЭТ МАЛ СҮРГИЙН ТАНЬ АРИУН ЦАГААН БУЯН ДЭЛГЭРЭХ БОЛТУГАЙ

БУЛГАН АЙМГИЙН БУГАТ СУМЫН АВИРМЭДИЙН БАТ-ЭРДЭНЭ ЗАХИРАЛТАЙ "ТА МЭД ЭРДЭНЭ" ХХК "УЛСЫН АВАРГА ТАРИАЛАНЧ ХАМТ ОЛОН"-ООР ШАЛГАРЧЭЭ
Булган аймгийн Бугат суманд үйл ажиллагаагаа явуулдаг "Та мэд эрдэнэ" ХХК-д "Улсын аварга тариаланч хамт олон"-оор өргөмжлөгдөн шалгарсан тул аймгийн Засаг дарга Д.Пүрэв-Очир баяр хүргэж, улсын аварга тариаланч хамт олны ажлын амжилт, алтан тариан ургац тариалалтад арвин их амжилтыг хүсэж баяр хүргэлээ.
А.Бат-Эрдэнэ захирал 2008 онд анх компаниа үүсгэн байгуулж, гэр бүлийн бизнес болгон хөгжүүлж ирсэн он жил бүртээ салбартаа тэргүүлж, он оны тэргүүн болж ирсэн бөгөөд 2024 онд "Алтан тариа" газар тариалан эрхлэгчдийн дээд шагнал хүртсэн амжилттай.
Гурван охин нь гэр бүлийнхээ бизнесийг үргэлжлүүлэн нягтлан, санхүү, маркетингийн мэргэжил эзэмшиж компанийнхаа үйл ажиллагааг өргөжүүлэн хөгжүүлж гар бие оролцон ажиллаж байна.
Үйлс бүхэн өрнүүн, үр бүхэн арвижин дэлгэрч байх болтугай.