Цаг үеийн мэдээ
ХИШИГ-ӨНДӨР СУМАНД АЖИЛЛАЛАА
Аймгийн Засаг дарга Д.Пүрэв-Очироор ахлуулсан хэлтэс агентлагын дарга нарын бүрэлдэхүүнтэй ажлын хэсэг Хишиг-Өндөр сумын төр төсвийн байгууллагын бодит нөхцөл байдалтай танилцаж иргэдтэй уулзалт зохион байгууллаа.
Уулзалтын үеэр Аймгийн Засаг дарга Д.Пүрэв-Очир “Булганы сэргэлт” хөтөлбөрийн хүрээнд хэрэгжүүлж буй цэцэрлэгийн хүүхдүүдийн STEAM хөтөлбөрийг хөгжүүлэх 3D интерактив эвлүүлдэг тоглоом, Архив, албан хэрэг хөтлөлтийн Улсын үзлэгтэй холбогдуулан сумын ЗДТГ-т 3 үйлдэлт принтер, Эрүүл мэндийн төвд тэргэнцэр, Хүнс хөдөө аж ахуй хөнгөн үйлдвэрийн Сайдын багцаас 21 сая төгрөгийн үнэ бүхий жижиг дунд үйлдвэрлэл эрхлэгчдэд зориулсан тоног төхөөрөмжийг тус тус хүлээлгэн өглөө.
Булган аймгийн Хишиг-Өндөр суманд Улсын төсвийн 2 тэрбум, 954 сая төгрөгийн өртөгтэй Ахмадын сувилалыг Улсын комисс хүлээн авч ашиглалтад ороход бэлэн болжээ. Булган аймгийн урд сумдын нэгдсэн ахмадын сувилал болгох зорилготой тус барилгыг аймаг орон нутгийн зүгээс хариуцагч, өмчлөгчийг шийдэж үйл ажиллагааг эхлүүлэх юм. Тус сувилалын үйл ажиллагаа эхэлснээр 20 гаруй ажлын байр нэмэгдэх боломжтой.
Төрийн албан хаагчдынхаа нийгмийн баталгааг хангаж орон нутгийн хөгжлийн сангийн 180 сая төгрөгийн өртгөөр зөөврийн орон сууцыг шийдсэн байна. Хишиг-Өндөр суманд ирэх 11 сард төрийн албан хаагчдын зөөврийн 4 орон сууц ашиглалтад орно.
Улсын төсвийн 32 тэрбум төгрөгийн өртөгтэй босоо тэнхлэгийн “Хишиг-Өндөр-Гурванбулаг” чиглэлийн 31.08 км авто замын ажил 90 хувийн гүйцэтгэлтэй явагдаж байгаа бөгөөд энэ онд багтаан 20 км замыг ашиглалтад оруулахаар ажиллаж байна. Тухайн замын ажил 2026 онд бүрэн дуусах юм.
Сэтгэгдэл үлдээх