Мэдээ

Булган сумын багуудын Иргэдийн нийтийн хурал боллоо

  • .

  • 2018-10-18

  • 133

Булган сумын 2-р багийн ИНХурал 10-р сарын 13-ны өдрийн 12 цагт, 3-р багийн ИНХурал 15 цагт, 10-р сарын 14-ны өдрийн 12 цагт 5-р баг, 15-н цагт 4-р багийн ИНХурал тус тус хуралдлаа. Багуудын ИНХуралд Булган аймгийн Засаг дарга З.Батзориг оролцож Булган аймгийн түүхт 80-н жилийн ойн бүтээлч ажлын мэдээллийг танилцуулж, иргэдийнхээ санал хүсэлтийг сонслоо. Нэгдүгээр дүгээр багийн ИНХурал 10-р сарын 22-ны өдрийн 15-н цагт Булган сумын ЗДТГ-ын хурлын танхимд болно.

"Булган түншлэл-2018" намрын үзэсгэлэн худалдаа

  • .

  • 2018-10-09

  • 157

"Булган түншлэл-2018" намрын үзэсгэлэн худалдаа Булган аймгийн Биеийн тамир спортын газрын А зааланд 2018 оны 10 сарын 8-10-ны өдрүүдэд зохион байгуулагдаж байна. Үзэсгэлэн худалдаанд Улаанбаатар, Дархан, Эрдэнэт хот болон Булган, Архангай, Хөвсгөл аймгуудын үйлдвэрлэл эрхлэгчид өөрсдийн үйлдвэрлэсэн бараа бүтээгдэхүүнээр оролцож байна.

Удирдах албан тушаалтны ээлжит шуурхай хурал боллоо

  • .

  • 2018-10-09

  • 119

Өнөөдөр удирдах албан тушаалтны ээлжит шуурхай хурал боллоо. Уг хурлаар ХХААГ-ын дарга Ч.Амгалан Ургац хураалт, хадлан тэжээлийн бэлтгэл ажлын талаарх мэдээллийг, УЦУОША-ны мэдээлэл үйлчилгээний хэлтсийн дарга Б.Нандинбат 10-р сарын цаг агаарын ерөнхий байдлын төлөв 10-3 дугаар сар хүртэлх цаг агаарын нэгдсэн мэдээллийг танилцуулсан бөгөөд ГБХЗХГ-ын дарга Т.Баярбат аймгийн залуучуудын холбооноос гаргасан уриалгыг танилцууллаа. "Байгаль орчныг хамгаалах тухай" хууль, "Хог хаягдлын тухай" хууль болон аймгийн Засаг даргын 2018 оны А/94 дүгээр захирамжийг хэрэгжүүлэх "Байгальд ээлтэй хамт олон" уралдааны болзлыг хангасан байгууллагуудыг шалгаруулж шагнав. Тус уралдааны 1-р байрыг Булган-Мээж ОНӨХК, 2-р байрыг БОАЖГ, 3-р байрыг УЦОША эзэллээ.

АХМАДЫН БАЯР 2018

  • .

  • 2018-10-03

  • 438

Олон улсын ахмадын баярыг тохиолдуулан  Булган аймгийн Хөгжимт жүжгийн театрт Ахмадын баярын хурал зохион байгуулагдаж тэргүүний ахмадуудынхаа хөдөлмөр зүтгэлийг үнэлж аймгийн Засаг даргын шагналуудаар шагнаж урамшууллаа. Мөн Булган сумын ахмадын хорооноос зохион байгуулсан волейбол, теннис, шатрын тэмцээний шилдгүүдийг шалгаруулав. Ахмадын баярын энэ өдөр харьяалалгүй ахмадуудаа хүлээн авч хүндэтгэл үзүүллээ.

Ахмад настнуудын дунд уламжлал болгон зохион байгуулдаг "Эрүүл амьдрал-Идэвхтэй хөдөлгөөн" спорт, явган аяллын тэмцээн Цогт хун тайжийн талбайгаас онгоцны буудлын хажуу талбай хүрэх маршруттайгаар /2018.10.2/ зохион байгуулагдсан юм.

 

Хануй голын сав газрын зөвлөл байгуулагдлаа

  • .

  • 2018-10-03

  • 131

Хануй голын сав газрын талуудын оролцооны зөвлөл байгуулагдаж анхдугаар хуралдаанаа хийлээ. Тус хуралдаанаар бүтэц зохион байгуулалт, зөвлөлийн ажиллах журмыг хэлэлцэн баталлаа. Зөвлөлийн бүрэлдэхүүнд орон нутгийн засаг захиргааны төлөөлөл, төрийн бус байгууллагын төлөөлөл, сумын иргэд, усны мэргэжлийн байгууллагын төлөөлөл, хэвлэл мэдээллийн байгууллагын төлөөлөл, судлаачид багтаж цаашид Хануй голын сав газрыг хамгаалах, нөхөн сэргээхэд хамтран ажиллахаар боллоо.

АХМАДЫН БАЯРЫН МЭНДЧИЛГЭЭ

  • .

  • 2018-10-01

  • 411

Ахмадын баяраар аймгийн Засаг дарга З.Батзоригийн хэлсэн үг

Эрхэм хүндэт Та бүхнийхээ амрыг эрж, ахмадын өдрийн мэндийг өргөн дэвшүүлж байгааг минь хүлээн авна уу.

Энэ жил Та бидний төрөлх Булган аймаг байгуулагдсаны түүхт 80 жилийн ой тохиосон. Наян жилийн тэртээ юм бүхэн тэгээс эхэлж байсан нь мэдээж. Анхны бүхэн амаргүй байдаг ч үе үеийн буянтай буурлууд минь оноо алдааны дэнсэн дунд тэмцсээр Булган аймгийг бүтээн байгуулж, босгон сүндэрлүүлж чаджээ.

Өнөөдрийн бидний дэвжиж хөгжсөн амьдрал, аймгийн хөгжил цэцэглэлт бол яах аргагүй ахмад үеийнхний маань нөр их хүч хөдөлмөр, сэтгэл зүтгэлийн үр дүн. Бид буянтай буурлуудынхаа хийж бүтээсэн, өвлүүлж үлдээсэн бүхнийг мартах учиргүй. Та бүхний сэтгэлийн дэм, санал шүүмжлэл, үнэтэй сургаалийн ачаар түүхт ойн баяр наадам маань өргөн дэлгэр, ёслол төгөлдөр болж өнгөрлөө.

Та бүхэндээ баярлалаа гэж хэлье.

Булганчууд бидний хувьд энэ жил бахархан тэмдэглэх, сурталчлан таниулах олон олон чухал ой тохиож байна. Тухайлбал Ардын Хатанбаатар Магсаржавын мэндэлсний 140 жил, нам, төрийн нэрт зүтгэлтэн Дашийн Дамбын мэндэлсний 110 жил, Баруун хязгаарын тулгаралтын 70 жил гэх мэт түүхэн тэгш ойн баяруудыг тэмдэглэх үйл ажиллагаа шат дараатай зохион байгуулагдлаа. Ирэх жил үндэсний эрх чөлөөний төлөө цогтой тэмцэгч, төр, нийгмийн нэрт зүтгэлтэн Чин Ван Ханддоржийн мэндэлсний 150, Халх голын байлдааны 80 жил, С.Цэрэн аваргын мэндэлсний 80 жил, Атар газар эзэмшсэний 60 жил гээд баярлаж наадахаас илүүтэй бахархан дуурсах учиртай ойн баярууд үргэлжилнэ.

НҮБ-аас энэ зууныг “Насжилтын зуун” болно гэж тодорхойлоод байгаа. Үнэхээр ахмадын маань эгнээ улам өргөжиж байна. Булган сумын ахмадууд гэхэд хэдхэн жилийн өмнө 1200 гаруй байсан бол өнөөдөр 1800 орчим боллоо. Ингэж өсөн нэмэгдэж байгаа ахмадуудын талаарх бодлого шийдвэрээ төр засаг жилээс жилд өргөжүүлсээр ирлээ. Энэ хүрээнд сонгуулийн эрхийн хугацааны үйл ажиллагааны “Хөгжлийн хөтөч” хөтөлбөрт олон зорилт дэвшүүлэн хэрэгжүүлэх арга хэмжээ өрнүүлж эхлэсэн. НҮБ-аас жил бүрийн 10 дугаар сарын 1-ийг “Олон улсын ахмадын өдөр” болгохоор 1990 онд шийдвэрлэж манай оронд 1992 оноос уламжлал болгоод байна.

Энэ дагуу АЗДТГ-аас төлөвлөгөө гарган сумдад хүргүүлж багагүй ажил өрнүүллээ. Булган суманд ажлын хэсэг томилж төлөвлөгөө гарган урьд жилүүдийн уламжлалын дагуу олон арга хэмжээ зохион байгууллаа. Тэдгээрт та бүхний төлөөлөл өргөн оролцсон байна.

Бидэнд ирсэн мэдээллээс хэлэхэд ахмадуудтай уулзалт хийх өдөр хүйтэн бороотой байсан ч борооны шүхрээ барьсаар сумын хурлын танхимд сандал суудалгүй болтол ирцгээсэн гэсэн.

Ахмад волейболчдын аварга шалгаруулах цомын төлөөх тэмцээнд софт төрлөөр оролцсон багууд хайнцаж тэнцэн их л өрсөлдсөн байна.

Шинэхэн гавьяат П.Оюунцэцэгийн нэрэмжит дууны уралдаан сайхан боллоо хэмээн ахмадууд ярьж байсан.

Мөн ахмадуудын спортын өдөрлөг өргөн болсон. Эдгээр ажлыг ивээн тэтгэсэн ХААН болон Төрийн банк, “Хуримт Итгэлт”, “БГГГ” компаниудад ахмадуудынхаа өмнөөс талархал илэрхийлье.

Нэгдсэн эмнэлэг ахмадуудыг нарийн мэргэжлийн эмч нарын үзлэг оношлогоонд хамрууллаа.

Энэ жилийн зарим шинэлэг ажил гэвэл УИХ-ын гишүүний дэмжлэгээр ахмадуудыг Улаанбаатар, Дархан хот, Аглаг бүтээлийн хийд зэргээр аялуулсан билээ. Ахмадын өдрөөр албан байгууллагуудад зохион байгуулах ажлын агуулга, хүрээг өргөтгөх талаар Булган МЭЭЖ компани ажил хэрэгч уриалга гаргалаа.

Цаг агаарын төлөв байдал, зарим ажлын давхардлын улмаас түр хойшилсон явган аялал, харъяалалгүй ахмадуудын төлөөлөлд хүндэтгэл үзүүлэх үйл ажиллагааг энэ өдрүүдэд зохион байгуулах болно.

Настангууд та бүхэнд хандсан асуудлыг зөвхөн ахмадын өдрийн арга хэмжээгээр хязгаарлахгүй ээ. Засгийн газар ирэх оныг ахмадын жил болгох зорилт тавьж байгаа. Тэр хүрээнд аймаг, орон нутагтаа олдон арга хэмжээ зохион байгуулна.

Аймгийн төвд Ахмадын ордны цогцолбортой болохоор энэ зун шавыг нь тавьсан. Хөрөнгө санхүүжилтийг төсөв болон бусад эх үүсвэрээр бүрдүүлэх асуудлыг шийдвэрлэх арга замыг хөөцөлдөж байна. Энэ ордонд геронтологийн төвийн салбар ахмадуудад зориулсан эрүүл мэндийн үйлчилгээ явуулж байх болно.

Ахмадууд бол эрч хүчтэй залуу насаа, эрдэм ухаанаа эзэмшсэн мэргэжил эрхэлсэн ажлаа улс, аймгийнхаа хөгжил дэвшилд зориулсан хүндтэй хүмүүс хэмээн бид бахархдаг. Ахмадын сургаал алт гэдэг. Засаг төрийн ажилд ч, зах зээлийн үйлдвэрлэлд ч та бүхнээс авах үлгэр дуурайлал, өвлөн суралцах зүйл их бий. Тиймээс та бүхэн ажлын арга барил, дадлага туршлагаасаа залуу хойч үеийнхэндээ харамгүй хэлж зөвлөж байхыг хүсч байна. Ажил үйлчилгээ төдийгүй айл өрхийн амьжиргааны талаар ч, хөрш саахалтынхнаас эхлээд хүн амд байнга сургамжлан зөвлөж байгаарай.

Булган сумаас “Зөвлөн туслагч-Өвлөн суралцагч” хөдөлгөөн өрнүүлэхээр нилээд ажил сэдэж байгаа. Энэ нь ахмадын дадлага туршлагаас суралцуулж, шинэ залуу ажилтнуудын ажлын арга барилыг сайжруулах боломжийг өргөжүүлнэ хэмээн үзэж байна.

Баринтагласан судар мэт баялаг үнэт сургаалтай ахмадууд та бүхэн эрүүл наслах дадал заншлаар хөгшрөлтөө сааруулж, насжилтаа нэмэгдүүлэхийн ерөөл дэвшүүлье.

Азай буурлууд минь амар амгалан байж, хань ижил, үр хүүхэд, ач зээ нартайгаа элэг бүтэн аж төрцгөөгөөрэй.

Та бүхэндээ баярлалаа, сайхан баярлаарай.   

 

 

UNFRIEND ХӨДӨЛГӨӨН БУЛГАН АЙМАГТ

  • .

  • 2018-09-26

  • 77

Сүүлийн үед цахим орчинтой холбоотой гэмт хэргийн тоо эрс өсч байгаа билээ. Өнгөрсөн оны байдлаар цахим орчинд 299 гэмт хэрэг гарч байсан бол энэ оны эхний хагас жилийн байдлаар 279 гэмт хэрэг бүртгэгджээ. Үүний 94 хувь нь залилан, 2.5 хувь нь сүлжээний гэмт хэрэг, 0.7 хувь нь бусдын нууцад халдах, 1.4 хувь нь садар самуунтай холбоотой гэмт хэргүүд үйлдэгдсэн аж. Үүнтэй холбоотой ЦЕГ-аас UNFRIEND хөдөлгөөнийг орон даяар зохион байгуулж байгаа. Булган аймгийн хүүхэд залуус энэ хөдөлгөөнд нэгдэж дуу хоолойгоо хүргэж байна.
Булган аймгийн Гэр бүл, хүүхэд залуучуудын газар, Цагдаагийн газар, Ерөнхий боловсролын сургууль, Мэргэжлийн сургалт үйлдвэрлэлийн төвүүд хамтран цахим гэмт хэргээс урьдчилан сэргийлэх, нөлөөлөх, мэдээлэл хийх, зөвлөгөө өгөх гэх мэт олон төрлийн үйл ажиллагааг зохион байгуулж эхлээд байгаа бөгөөд өнөөдөр төв гудамжийндаа тайван жагсаал хийж илүү олуулаа нэгдэхийг хүслээ.
Судалгаагаар 7 хүүхэд тутмын нэг нь садар самуунд уруу татсан зурвасыг нийгмийн сүлжээгээр дамжуулан авдаг гэж гарсан байдаг. Тиймээс уг хөдөлгөөнийг санаачлагч, зохион байгуулагчдаас эцэг эхчүүдэд хандан хүүхдүүдийнхээ цахим хаягт хяналт тавихыг, тэдэнд энэ талаар ойлголттой байж сэрэмжлүүлэхийг онцгой анхаарулж байна. мөн өсвөр насны сурагчид, залуучууд сошиал орчинд бие биедээ эерэг мэдээлэл түгээхийг уриалсан байна.

 

АЙМГИЙН ОНЦГОЙ КОМИСС ХУРАЛДЛАА

  • .

  • 2018-09-26

  • 64

Өнөөдөр /2018.09.25/ аймгийн онцгой комисс хуралдаж аймгийн Засаг дарга, онцгой комиссын дарга З.Батзориг төв суурингийн болон мал аж ахуйн өвөлжилтийн бэлтгэл ажлын явц, гамшгаас хамгаалах команд штабын сургууль зохион байгуулсан тайлан мэдээллийг сонсож, холбогдох байгууллагуудын удирдлагуудад үүрэг чиглэл өглөө.
1. Булган сумын төвөөс мал бүхий иргэдийг гаргах ажлыг яаралтай зохион байгуулах
2. Малын шилжилт хөдөлгөөнийг аймгийн хэмжээнд хорих
3. Хадлан тэжээлийг зүүн аймгуудаас авахыг хориглосныг сумдууд, малчдад онцгой анхааруулах
4. Гарал үүсэл, эрүүл мэндийн баталгаагүй эцэг малыг бусад аймгаас авахыг хатуу хориглох
5. Хулгайн мод тээвэрлэлтэд тавих хяналтыг сайжруулах
6. Нүүрс татан авалтыг нэмэгдүүлж нөөц бэлтгэх
7. Төв суурийнгийн өвөлжилтийн бэлтгэл ажлыг сайтар хангах
8. Сумдад өвөлжилтийн бэлтгэл хангах ажлыг шалгасан ажлын хэсгийн ахлагч нар тухайн суманд учирч буй тулгамдсан асуудлыг өөрийн биеэр яаралтай шийдвэрлэхэд анхаарах зэрэг болон бусад асуудлаар үүрэг чиглэл өглөө.

 

Ардын Хатанбаатар Сандагдоржийн Магсаржав

  • .

  • 2018-09-24

  • 444

Сандагдоржийн Магсаржав нь 1878 оны 4 дүгээр сарын 10-нд Сайн ноён хан аймаг, одоогийн Булган аймгийн Хутаг-Өндөр сумын нутагт Өвөр цагаан бургас хэмээх газар ядуу тайж Сандагдоржийн ууган хүү болон мэндэлжээ. Магсаржавын өвөг дээдэс голдуу цэргийн гавъяаны гүн цолтой хүмүүс байсан бөгөөд Магсаржав нь 7 дахь үеийн хүн байжээ. 11 насандаа сайн ноён аймгийн хошуу ноён Ганжуржав гүнд шавь орон бичиг үсэг заалгаж, 25 нас хүртлээ шавь суусан байна. 1905 оны 7 сард язгууртны зэрэг залган Магсаржавыг Ховд дахь амбан яамны дэргэд хугацаалан суулгах Халхын жасаанд тохоон томилогдсон байна.

  • 1911 онд Монгол улс тусгаар тогтнолоо зарласны дараагаар шинэ байгуулагдсан засгийн газраас амбаныг зайлан явах шаардлагыг Магсаржав амбан ноёнд дамжуулсан боловч гарч явахаас татгалзсан байна. 1912 оны зун Баруун хязгаарыг төвшитгөн тогтоох сайдад Баргын Манлайбаатар Дамдинсүрэнгийн хамтаар томилогдон Ховдыг дайран эзлэх ажиллагааг шууд удирдаж, Манж, Хятадуудыг буулгаж авчээ. Манжаас тусгаарлах Үндэсний эрх чөлөөний хөдөлгөөнд Ховдыг чөлөөлсөн гарамгай гавьяаг нь үнэлэн Богд хаант Монгол улсын Засгийн газраас Магсаржавыг үе улиран залгамжлах Хатанбаатар ван цолоор шагнажээ. 1913 оны хавар Хятадын залхаан цээрлүүлэх цэрэг Өвөр Монголд орж ирэхэд Магсаржав, Дамдинсүрэн нарын цэргийн хүч очин тулалдаж амжилт олж байсан боловч Хаант Орос улс Хятад, Японтой эвдрэлцэхээс болгоомжлон оролцсон тул түүнийг эргүүлэн татжээ. Үүний дараагаар зүүн хязгаарт Бавуужавын довтолгоог дарах, 1918 онд хил нэвтрэн орж ирсэн Оросын цагаан цэргүүдийг зогсоох цэрэг дайны үйл ажиллагаануудад оролцож байжээ.
  • 1919 оны намар Хятадын генерал Сю Шүжан Монголын автономитыг унагасан ба 1920 оны дундуур Магсаржавыг нууц бүлгэмийнхэнтэй хэлхээ холбоотой хэмээн сэжиглэж баривчилжээ. 1921 оны 2-р сард Барон Унгерн Их Хүрээг эзлэн авахад суллагдан цагаантанд нийлж Унгерны сэргээн тогтоосон Богд хааны засагт Ерөнхий сайдын үүрэг богино хугацаанд гүйцэтгэжээ. Түүнийг баруун аймгуудыг товхинуулахаар илгээсэн боловч 1921 оны 7 сарын дундуур Монгол Ардын Намынхантай санаа нэгдэж Улиастайд байсан цагаантны удирдагч буриад Вандановыг дарж устгажээ. 1921 оны намар, өвөл Хатанбаатар Магсаржав баруун аймгууд дахь цагаантны цэргийн хүчнүүдийг дарж устган гавьяа байгуулжээ. 1922 онд ердийн цэргийн яамны сайдаар томилогдож, Дамдины Сүхбаатар Магсаржавыг өөрийн биеэр даалт гаргаж МАХН-ын гишүүнд орлогчийн хугацаа дамжуулахгүйгээр шууд элсүүлэн авчээ. 1924 онд МАХН-ын төв хорооны гишүүнээр сонгогдсон ба Москва хотод албан айлчлал хийж байжээ
  • Богд хаант Монгол улсын засгийн газраас түүнд Хатанбаатар гэсэн цолыг олгож байжээ. 1914 онд Шар жолоо одонгоор шагнагдсан. 1922 онд Зөвлөлт Орос Улсын Засгийн Газраас Байлдааны гавъяаны улаан тугийн одон, 1924 онд Ардын Засгийн Газраас Ардын хэмээх эрхэм цолыг олгожээ. Ардын Хатанбаатар Магсаржавын алдар гавъяаг нь мөнхжүүлэх зорилгоор Булган аймгийн төв Дуулгат бунханыг байгуулж шарилыг нь шилжүүлэн бунхалсан байна. Нутгийн ард түмэн Магсаржавыг шулуун шударга зантай, ажилсаг хичээнгүй, олон үггүй төлөв төвшин, эрэмгий зоригтой, морины ба бөхийн цолыг сайхан дууддаг, дуунд авъяастай байсан хэмээн ярилцдаг байжээ. Тэрбээр 1927 оны 9 дүгээр сарын 3-нд нас баржээ. 1998 онд Монгол Улсын Засгийн Газрын 39-р тогтоолоор Булган аймгийн Хутаг-Өндөр сумын дунд сургуулийг Ардын Хатанбаатар С.Магсаржавын нэрэмжит сургууль болгосон.

"UNFRIEND" хөдөлгөөн Булган аймагт

  • .

  • 2018-09-24

  • 110

Өсвөр насны хүүхдүүдийг цахим гэмт хэрэг, зөрчил, эрсдэлт хүчин зүйлсээс урьдчилан сэргийлэх, хамгаалах тэдний цахим орчин дахь зүй зохистой хэрэглээг бий болгох зорилготой "UNFRIEND" хөдөлгөөн Булган аймагт явагдаж байна. "UNFRIEND" хөдөлгөөний хүрээнд багш нар болон төрийн албан хаагчдыг хамруулсан цахим гэмт хэрэг зөрчлийн талаар сургалтыг зохион байгууллаа.

ХЭЛМЭГДЭГСДИЙН ӨДӨР

  • .

  • 2018-09-24

  • 308

Аймгийн удирдлагууд улс төрийн хилс хэрэгт хэлмэгдэгсдийн дурсгалыг хүндэтгэж, хэлмэгдэгсдийн хөшөөнд цэцэг өргөлөө. Мөн тэдгээрийн ар гэр, үр хүүхдүүдэд хүндэтгэл үзүүллээ.

Бүрэн бус мэдээгээр Монгол улсад 37 мянга орчим хүнийг хэлмэгдүүлсэн гэж үздэг бөгөөд 1939 оноос эхлэн 31,220 хүнийг цагаатгаад байна. Улс төрийн хилс хэрэгт хэлмэгдэгчдийг цагаатгах, тэдэнд нөхөх олговор олгох тухай хуулийн 13 дугаар зүйлд заасны дагуу улс төрийн хилс хэрэгт хэлмэгдэгч, тэдний гэр бүл, ач, зээ 18,200 гаруй иргэнд 16.3 тэрбум төгрөгийн нөхөх олговрыг мөнгөн хэлбэрээр олгосон байна.

“Номын баяр – 2018”

  • .

  • 2018-09-24

  • 98

Монгол Улсын Ерөнхийлөгчийн 2012 онд 158 дугаар зарлиг гаргаж, уламжлалт зан заншлаа хөгжүүлж, ард иргэд хүүхэд залуусын ном эрдэмд эгээрэн нөхөрлөх хандлагыг улам бүр дэмжих зорилгоор, жил бүрийн 9 дүгээр сарын гурав дахь долоо хоногийн Бямба гарагийг “Номын баярын өдөр” болгосон билээ.

“Номын баяр – 2018” арга хэмжээг уламжлалын дагуу улсын хэмжээнд нэгдсэн төлөвлөгөө, удирдамжийн дагуу өнөөдөр манай аймагт зохион байгуулагдлаа.

Номын баярт зохиолч, яруу найрагчид,  номын сангууд, ном, эрдмийг  эрхэмлэн дээдэлдэг, сурталчилж түгээн дэлгэрүүлдэг байгууллага, иргэд оролцсон юм.

Энэ жилийн уламжлалт баяр нь  Монголын Зохиолчдын Эвлэлийн 90 жилийн ойн  босгон дээр болж байгаагаараа онцлог төдийгүй нийтийн уншлагыг дэмжих, ном эрдмийг түгээх, нэрт зохиолчдын алдар гавьяаг алдаршуулах, хойч үедээ сурталчлах зорилгоор Монгол улсын ардын уран зохиолч, Төрийн 3 удаагийн шагналт, эрдэмтэн  зохиолч, орчуулагч Цэндийн Дамдинсүрэн/110 жил/,/, Монгол Улсын Төрийн шагналт,  Ардын уран зохиолч Дэндэвийн Пүрэвдорж  /85/,  Монгол Улсын Төрийн шагналт,  Ардын уран зохиолч Шаравын Сүрэнжав /80 жил/ зэрэг тэгш ой нь тохиож буй зохиолчдын намтар, бүтээлийн үзэсгэлэнг номын сангуудтай  хамтран зохион байгуулж байгаагаараа онцлог юм байна.

Энэхүү үйл ажиллагааны хүрээнд “Хүүхдүүдээ дэлгэцнээс аварья” аян, шинэ номын нээлт, номын хямдралтай худалдаа,  номын төрөлжсөн үзэсгэлэн, эцэг эх, хүүхдүүдийг оролцуулсан хөгжөөнт тоглоом, номын бэлэг, урамшуулалтай тэмцээн, уралдааныг зохион байгууллаа.

Хуудас:  1   2   3   4   5   6   7   8  .... (нийт 347 мэдээ )

Булган 80-н жил